#كل ماجيت أزرع الطيب واسوي جميل

كل ماجيت أزرع الطيب واسوي جميل = الجميله تالي الوقت قلوا ناسها
الجميله ما بقى من عربها الا القليل = مابقى الا عالمٍ كاثرٍ وسواسها
والجميله ماتناسب من النذل البخيل = لو بغاها ماعرف ذيلها من راسها
راح جيل المعرفه وابتدا جيل المديل = وابتلشت بعالمٍ ماعرفت اجناسها
تختلف الاجيال ويصير جيل بعد جيل = والاوادم يختلف فعلها واقواسها
لو بغيت تعدل الناس شئ مستحيل = فرقها بافعالها مايجي بلباسها
لا تحط ضعيّف النفس بالطرقه زميل = دوّر اللي لا تكبّر خطرها داسها
والضعيّف جنبه مامعه حيله وحيل = رافق اللي قد سبح بالبحور وقاسها
واشهد ان ضعيّف النفس مايصلح عميل = والضعافه عند ناسٍ ضعيف احساسها
مابغي النفس الضعيفه ولا الرجل الذليل = كل ماجينا نسوي جميله حاسها
افتخر في عاقل مايعيل ولا يميل = خطته لا من رسمها يعرف قياسها
يحتمل طول المسافات والخط الطويل = لا تعكر جو نفسك يزيل عماسها
الحكيم اللي على المعرفه رايه دليل = من رجال بالمواقف قويٍ باسها
اشهد ان الظلم والخوف والحال الهزيل = حاجة تثر على النفس في مجلاسها
واشهد ان الصبر زينٍ وله وزن ثقيل = مزبنٍ للنفس لا من كثر هوجاسها
ليت بعض الناس حرفٍ نزيله بالمزيل = من حروف تنمسح لا انمسح قرطاسها
ماتصير الحنظله مثل شكل الزنجبيل = لو تغيّر شكلها ماتغيّر ساسها



لـ الشاعر ؛ مبارك بن فايز بن حمود البخيّت السبيعي

#القصيد الجزل