يا ناشدٍ عني تبي شرح الأخبار

يا ناشدٍ عني تبي شرح الأخبار
دنيا البنادم بين ربح وخساره
أصارع الدنيا على كف الأقدار
أشرب حلاويها وأذوق المراره
أحيان تقبل كنها ريح الأزهار
يضحك احجاج الوقت وأطرد خضاره
وأحيان تقفي كنها عاصف غبار
يلفح سموم الوقت وجه النضاره
وقتي خصيمي بيننا يقدح الثار
ياكم تناوخنا بغاره وغاره
يكرب ذلول الضيق وأعسف له مهار
أما جبرني وإلا بان إنكساره
والرجل قلبه قيل صندوق الأسرار
وألا الخبل قلبه محطة أخباره
ودام المعزه للرجل رمز وشعار
ما يلتفت للي مداهم جحاره
والبندق اللي مالها ميز وعيار
تخطي هدفها لو يشوف الاشاره
راع الردا مشهور في طفية النار
والحر في عينه تقادح شراره
ما كل رجلٍ يحسب حساب الأخيار
ولا كل عرف يسجلونه تجاره
راع الوفا ما بار لو الزمن بار
يبقى مع الأيام ثابت
وسوق التجارب تختلف فيه الأسعار
ودنيا البنادم بين ربح وخساره...


#منقول
#القصيدالجزل