قالوا حكوا بك قلت وش هم يقولـون وش قيـل فينـا يالوجيـه الفليحـه

قالوا حكوا بك قلت وش هم يقولـون
وش قيـل فينـا يالوجيـه الفليحـه
شوفوا مردُ الهرج وش هم يطـرون
حتى نعرف مـزوره مـن صحيحـه
كان الكلام من المعادي علـى هـون
بعض المسبـه بالمجالـس مديحـه
تجيـه عربـانٍ مــن الله يـخـافـون
عـن الظليمـه ينصحونـه نصيحـه
لو كل خلق الله على الحق يمشـون
كان القلوب مـن الخطـا مستريحـه
كم واحدٍ بعروض الأجـواد مفتـون
وهـو سلومـه يفضحنـه فضحيـه
وكم واحدٍ يطعن وهو فيـه مطعـون
يذم ريـح النـاس والشيـن ريحـه
بعض كلام الناس تهمـات وضنـون
قـولٍ تنميـه الوجـيـه الوقيـحـه
الظلم لو فـازوا هلـه مـا يدومـون
راع الظليمـه لاتبـاطـى مطيـحـه
والناس هذي الناس من عصر ذالنون
كلن علـى دربـه ركابـه مشيحـه
مقرود يامـن بـدل اللـون باللـون
بعض الكلام يحرفـه عـن صحيحـه
والصدق هو والكذب ماهو بمقـرون
كان إنها تـدرس بلهجـه فصيحـه
مايمـدح الرجـال بالشكـل واللـون
إبحث معه لينـك تعـرف القريحـه
تراك تعرف عنـه وأنتـم تهرجـون
يبين لك مـن كـل جـودٍ نضيحـه
المستريح اللي مـن الشـك مامـون
مع كـل خلـق الله علومـه مليحـه
كم واحدٍ حـيٍ لـه النـاس يثنـون
وإليـا توفـى قـالـوا الله يبيـحـه
وكم واحد لو هو باالألحـاد مدفـون
ذكراه عند النـاس بيضـا صفيحـه
وكم واحدٍ يجمـع ملاييـن وخـزون
مـالٍٍ تنميـه اليـديـن الشحيـحـه
لا تشكـره رملـى ولا فـك مديـون
ولا حل مشكلـة النطيـح ونطيحـه
ولا له على جاره من الفضل ماعون
لـو إن جيرانـه تشـوف الذبيحـه
وكم واحدٍ جيـران بيتـه يحمـدون
للجـار ريـف وللجماعـه منيـحـه
وكم واحدٍ منـه العـوادي يخافـون
زبن المخيف اللـي كثيـرن فحيحـه
ربعه نهـار الضيـق فيـه يتـذرون
لا جـا نهـارٍ فيـه لجـه وصيحـه
وبعض الرجال بهم شريفين وعفـون
كلـن علـى ماقيـل يرجـع لكيحـه
وبعض الرجال بضحكهـم يستغلـون
يجيبهـا مـن نـوع زلقـه بطيحـه
هذاك بين له مـن الهـرج مدفـون
خلـه إليـا شافـك يزيـن سميحـه
الهـرج لـه نقـال والـرد للشـون
مزح الجـزع يثـر بكبـدك جريحـه
هذا وأنا ماني من النـاس ملسـون
لاشك أرفـض مـن تزايـد جميحـه
قلته وكل النـاس غيـري يقولـون
راع الظليمـه لا تباطـى مطيـحـه!!

لـ شاعر مرشد البذال